മദ്യനയ അഴിമതി കേസിൽ ഡൽഹി മുൻ ഉപമുഖ്യമന്ത്രിയും ആം ആദ്മി പാർട്ടി നേതാവുമായ മനീഷ് സിസോദിയയെ തീഹാർ ജയിലിലേക്ക് അയക്കാൻ ഉത്തരവ്. മാർച്ച് 20 വരെ സിസോദിയയെ ജുഡീഷ്യൽ കസ്റ്റഡിയിൽ വിടാനാണ് ഡൽഹി പ്രത്യേക കോടതിയുടെ വിധി. മദ്യം കുംഭകോണക്കേസിൽ അറസ്റ്റിലായതിനെ തുടർന്ന് സിസോദിയ ഒരാഴ്ചയായി സിബിഐ കസ്റ്റഡിയിലാണ്. കേസുമായി ബന്ധപ്പെട്ട് ഫെബ്രുവരി 26നാണ് മനീഷ് സിസോദിയയെ സി ബി ഐ അറസ്റ്റ് ചെയ്തത്. ആദ്യം അഞ്ചുദിവസത്തെ സി.ബി.ഐ കസ്റ്റഡിയിൽ വിട്ട കോടതി പിന്നീട് റിമാന്റ് കാലാവധി രണ്ടുദിവസത്തേക്ക് കൂടി നീട്ടുകയായിരുന്നു. അത് അവസാനിച്ചിരിക്കെയാണ് ഇന്ന് വീണ്ടും കോടതിയിൽ ഹാജരാക്കിയത്.
By Firdousy E R
വോക്ക് മലയാളത്തില്‍ ഡിജിറ്റല്‍ ജേര്‍ണലിസ്റ്റ് ട്രെയ്‌നി. ജീവന്‍ ടി വിയില്‍ പ്രവര്‍ത്തന പരിചയം.