മുംബൈ: മാവോവാദി ബന്ധവുമായി ബന്ധപ്പെട്ട കേസിൽ ശിക്ഷിക്കപ്പെട്ട ഡൽഹി സർവകലാശാല മുൻ പ്രഫ ജിഎൻ സായിബാബ നാഗ്പൂർ സെൻട്രൽ ജയിലിൽ നിന്ന് മോചിതനായി. വിധി വന്ന് രണ്ടുദിവസത്തിന് ശേഷമാണ് ജയിലിൽ നിന്ന് മോചിതനാകുന്നത്.
ആരോഗ്യം വളരെ മോശമാണെന്നും ചികിത്സ തേടിയ ശേഷം സംസാരിക്കാമെന്നും ആയിരുന്നു ജയിലിൽ നിന്നിറങ്ങിയ സായിബാബ പ്രതികരിച്ചത്.
ബോംബെ ഹൈക്കോടതിയുടെ നാഗ്പൂർ ബെഞ്ച് ചൊവ്വാഴ്ചയാണ് സായിബാബയോടൊപ്പം അഞ്ച് പ്രതികളെയും കുറ്റവിമുക്തരാക്കിയത്.
അപ്പീൽ സാധ്യതയുള്ളതിനാൽ 50,000 രൂപ കെട്ടിവെച്ചിട്ടും സായിബാബയുടെ മോചനം നീട്ടികൊണ്ടു പോവുകയായിരുന്നു. ഇതുമായി ബന്ധപ്പെട്ട ഇ മെയിൽ നാഗ്പുർ സെൻട്രൽ ജയിലിൽ ലഭിക്കാത്തതിനെ തുടർന്നാണ് മോചനം വൈകിപ്പിച്ചത് .
2014 ലാണ് സായിബാബ ആദ്യം അറസ്റ്റിലായത്. റവല്യൂഷനറി ഡെമോക്രാറ്റിക് ഫ്രണ്ട് എന്ന സംഘടനയുമായി ബന്ധപ്പെട്ട് മഹാരാഷ്ട്രയില്‍ നടത്തിയ പ്രവര്‍ത്തനങ്ങളുടെയും പ്രസംഗങ്ങളുടെയും പേരിലായിരുന്നു ഇവരെ അറസ്റ്റ് ചെയ്തത്. മാവോയിസ്റ്റ് ബന്ധമുള്ള സംഘടനയാണ് ഇതെന്നായിരുന്നു ആരോപണം.
2016ൽ ജാമ്യം കിട്ടിയെങ്കിലും 2017 ൽ വീണ്ടും അറസ്റ്റിലായി. പ്രത്യേക വിചാരണ കോടതി ജീവപര്യന്തം ഉള്‍പ്പെടെയുള്ള ശിക്ഷകള്‍ വിധിച്ചു.