Fri. Mar 29th, 2024
ന്യൂഡൽഹി:

പശ്ചിമബംഗാൾ മുഖ്യമന്ത്രി മമത ബാനർജി രാജ്യത്തെ എല്ലാ ഭീകരവാദികളുടെയും രാഷ്​ട്രീയ മാതാവാണെന്ന്​ ബി ജെ പി നേതാവ്​. ഭാരതീയ ജനത യുവമോർച്ച പ്രസിഡന്‍റും ലോക്​സഭാംഗവുമായ സൗമിത്ര ഖാനിൻറെതാണ്​ വിവാദ പരാമർശം. ബംഗാളിൽ ബോർഡർ സെക്യൂരിറ്റി ഫോഴ്​സിന്‍റെ അധികാര പരിധി 15 കിലോമീറ്ററിൽ നിന്ന്​ 50 കിലോമീറ്ററായി വർദ്ധിപ്പിച്ച കേന്ദ്രസർക്കാർ തീരുമാനം പിൻവലിക്കണമെന്ന്​ ആവശ്യപ്പെട്ട്​ മമത ബാനർജി പ്രധാനമന്ത്രി നരേന്ദ്രമോദിക്ക്​ കത്തെഴുതിയതിന്​ എതിരെ പ്രതികരിക്കുകയായിരുന്നു സൗമിത്ര ഖാൻ.

മമത ബാനർജിയുടെ വാക്കുകൾ ശ്രദ്ധിക്കരുതെന്ന്​ പ്രധാനമന്ത്രിയോട്​ അഭ്യർത്ഥിച്ച ഖാൻ, ബംഗാളി​നെ നശിപ്പിച്ചതുപോലെ രാജ്യത്തെയും തകർക്കാൻ ശ്രമിക്കുകയാണ്​ മമത ബാനർജിയെന്നും അറിയിച്ചു. മമത ബാനർജി ഇന്ത്യയെ ഒരു ധർമശാലയാക്കി മാറ്റാൻ ശ്രമിക്കുകയാണെന്നും ആരോപിച്ചു. ‘രാജ്യത്തെ എല്ലാ ഭീകരവാദികളുടെയും മാതാവാണ്​ മമത ബാനർജി. കാരണം പൗരത്വ ഭേദഗതി നിയമം പാർലമെന്‍റിൽ പാസാക്കിയപ്പോൾ അവർ എതിർത്തു.

പൗരൻമാർക്കായി ദേശീയ രജിസ്റ്റർ പാസാക്കി. അതിനെയും എതിർത്തു. കാരണം അവർക്ക്​ ഇന്ത്യയെ ധർമശാലയാക്കി മാറ്റണമായിരുന്നു. റോഹിങ്ക്യകൾ രാജ്യത്ത്​ പ്രവേശിച്ച്​ ആളുകളെ കൊല്ലുകയും സർക്കാറിന്‍റെ പണം കൊള്ളയടിക്കുകയും ചെയ്യുന്ന ഒരു ധർമശാലയാണോ ഇന്ത്യ​?’ -ഖാൻ ചോദിച്ചു.

രാജ്യത്തിന്‍റെ അഖണ്ഡത ഇല്ലാതാക്കാനാണ്​ മമത ശ്രമിക്കുന്നതെന്നും സൗമിത്ര പറഞ്ഞു. ‘രാജ്യത്തിന്‍റെ അഖണ്ഡത ഇല്ലാതാക്കാൻ മമത ബാനർജി റോഹിങ്ക്യകളെ പിന്തുണക്കുന്നു. ബി എസ്​ എഫ്​ പരിധി 15 കിലോമീറ്ററിൽനിന്ന്​ 50 കിലോമീറ്ററായി ഉയർത്തുമ്പോൾ ഭീകരവാദികൾക്ക്​ ഇന്ത്യയിൽ പ്രവേശിക്കാൻ കഴിയില്ലെന്നതാണ്​ അവരെ അസ്വസ്​ഥമാക്കുന്നത്​. അതാണ്​ അവരുടെ രാഷ്ട്രീയമെന്നതിനാൽ അതിനെ അവർ എതിർക്കുന്നു’ -ഖാൻ പറഞ്ഞു.

‘രാജ്യത്തിന്‍റെ ഘടനയിൽ അവർ എപ്പോഴെങ്കിലും വിശ്വസിച്ചിട്ടുണ്ടോ​​? സംസ്​ഥാനങ്ങളില​ും വിശ്വാസമില്ല. നിയമസഭ നിയമക്രമങ്ങൾ അവർ പാലിക്കുന്നില്ല. രാജ്യത്തെ എതിർക്കുക മാത്രമാണ്​ അവരുടെ ജോലി’ -ബംഗാൾ നിയമസഭയിൽ പ്രമേയം പാസാക്കാനുള്ള എതിർപ്പ്​ അറിയിച്ച്​ ഖാൻ പറഞ്ഞു.