Fri. Mar 29th, 2024
ദോഹ:

ഇസ്രായേൽ പലസ്​തീനിൽ നടത്തുന്ന ആക്രമത്തിനെതിരെ പലസ്​തീന്​ ഐക്യദാർഢ്യവുമായി ആയിരങ്ങൾ ഖത്തറിൽ ഒത്തുകൂടി. ഇന്ത്യക്കാരടക്കം നൂറുകണക്കിനാളുകളാണ്​ ബാനറുകളും പലസ്​തീൻ കൊടികളുമേന്തി ഇമാം അബ്​ദുൽ വഹാബ്​ പള്ളി (ഗ്രാൻഡ്​ മോസ്​ക്​) പരിസരത്ത്​ ശനിയാഴ്​ച സംഗമിച്ചത്​.

വൈകുന്നേരം ഏഴിന്​ തുടങ്ങിയ ഐക്യദാർഢ്യ സംഗമം രാത്രി പത്തുമണി വരെ നീണ്ടു. നൂറുകണക്കിന്​ ഖത്തരികളും വിദേശികളും പ​ങ്കെടുത്തു. ഹമാസിൻെറ രാഷ്​ട്രീയകാര്യ മേധാവി ഡോ ഇസ്​മായിൽ ഹനിയ്യയും ആഗോള മുസ്​ലിം പണ്ഡിതസഭ ജനറൽസെക്രട്ടറി അലി അൽഖുറദാഇ ഉൾപ്പെടെയുള്ളവരും പ​ങ്കെടുത്തു. ‘നഹ്​നു പലസ്​തീൻ യാ ഹയ്യാ… യാ ഖത്തർ യാ ബയ്യാ…’ (നമ്മുടെ പലസ്​തീൻ അതിജീവിക്ക​ട്ടെ, ഖത്തർ എന്നും ഉയരങ്ങൾ താണ്ട​ട്ടെ) എന്ന മുദ്രാവാക്യം ജനങ്ങൾ ഉറക്കെചൊല്ലി.

മുനീസ്​ പലസ്​തീൻ അതിജയിക്കുമെന്നും അന്തിമവിജയം പലസ്​തീന്​ ആയിരിക്കുമെന്നും ജനങ്ങൾ ഒന്നടങ്കം ഏറ്റുപറഞ്ഞു. ഖത്തറിന്​ പലസ്​തീനുമായി ചരിത്രപരമായ ബന്ധമാണുള്ളതെന്നും ഖത്തർ ഭരണാധികാരികൾ പലസ്​തീന്​ നൽകുന്ന പിന്തുണയും സഹായവും ഏറെ വലുതാണെന്നും ഡോ ഇസ്​മായിൽ ഹനിയ്യ പറഞ്ഞു.

‘ഇംഗ്ലണ്ട്​ ഇംഗ്ലീഷുകാരുടേയും ഫ്രാൻസ്​ ഫ്രഞ്ചുകാരുടേതുമെന്നതുപോലെ പലസ്​തീൻ അറബികളുടേതാണ്’​ എന്ന്​ നിലപാട്​ കൈകൊണ്ടിരുന്ന മഹാത്​മാഗാന്ധിയുടെ ചിത്രവും ഇന്ത്യൻ പതാകയുമേന്തി മലയാളികളടക്കമുള്ളവരും പ്രതിഷേധത്തിൽ പങ്കുചേർന്നു. സ്​ത്രീകളും കുട്ടികളുമടങ്ങുന്ന ആയിരങ്ങളാണ്​ സംഗത്തിൽ തടിച്ചുകൂടിയത്​.

By Divya