ന്യൂഡൽഹി:
രാജ്യം നേരിടുന്ന കൊവിഡ് വാക്സിൻ പ്രതിസന്ധിക്കെതിരെ വീണ്ടും ആഞ്ഞടിച്ച് കോൺഗ്രസ് നേതാവ് രാഹുൽ ഗാന്ധി. ‘രാജ്യത്തിന് ആവശ്യം കൊവിഡ് വാക്സിനാണ്. ഇതിനായി നിങ്ങൾ ശബ്ദമുയർത്തേണ്ടതുണ്ട്. സുരക്ഷിതമായ ജീവിതത്തിന് എല്ലാവർക്കും അവകാശമുണ്ട്’ -രാഹുൽ ഗാന്ധി ട്വിറ്ററിൽ കുറിച്ചു.
രാജ്യത്ത് കൊവിഡ് കേസുകൾ ദിനംപ്രതി വർദ്ധിക്കുന്നതിനിടയിൽ വാക്സിൻ ക്ഷാമം നേരിടുന്നത് പ്രതിസന്ധി തീർക്കുന്നുണ്ട്. രാജ്യത്താകമാനം 1,68,912 പേർക്കാണ് കഴിഞ്ഞ 24 മണിക്കൂറിനിടെ കോവിഡ് ബാധിച്ചത്. 904 പേർ മരിക്കുകയും ചെയ്തു. പല സംസ്ഥാനങ്ങളിലും രണ്ട് ദിവസത്തേക്ക് മാത്രമുള്ള വാക്സിനാണ് ബാക്കിയുള്ളത്.
കേന്ദ്ര സർക്കാറിന്‍റെ ദീർഘവീക്ഷണമില്ലായ്മയും കൊവിഡ് പ്രതിരോധത്തിലെ അലംഭാവവും ശാസ്ത്രലോകവും വാക്സിൻ നിർമാതാക്കളും എടുത്ത പരിശ്രമത്തെ ദുർബലപ്പെടുത്തിയെന്നായിരുന്നു അദ്ദേഹത്തിന്‍റെ വിമർശനം.
ആവശ്യക്കാർക്കെല്ലാം എത്രയും വേഗം വാക്സിൻ ലഭ്യമാക്കണമെന്ന് പ്രധാനമന്ത്രിക്ക് അയച്ച കത്തിൽ അദ്ദേഹം ആവശ്യപ്പെട്ടിരുന്നു.