ജിദ്ദ:
സൗദിയിൽ കടൽ കേന്ദ്രീകൃത വിനോദ സഞ്ചാര മേഖല വിപുലമാക്കാൻ ‘സൗദി ക്രൂയിസ്’ എന്ന പേരിൽ കമ്പനി ആരംഭിച്ചു. സൗദി പൊതുനിക്ഷേപ നിധിക്ക് കീഴിലാണ് കമ്പനി രൂപവത്കരണം. വിഷൻ 2030 ലക്ഷ്യമിട്ട് ടൂറിസം മേഖല വികസിപ്പിക്കുകയും കടലുമായി ബന്ധപ്പെട്ട ടൂറിസം ഭൂപടത്തിൽ രാജ്യാന്തര വിനോദ കേന്ദ്രമാക്കി രാജ്യത്തെ മാറ്റുകയും ചെയ്യുന്ന പദ്ധതിയാണിത്. കമ്പനിയുടെ ആസ്ഥാനം ജിദ്ദയിലായിരിക്കും.
കടലും കരയും തമ്മിലെ പാലമായി സൗദി ക്രൂയിസ് കമ്പനി പ്രവർത്തിക്കും. സൗദി ടൂറിസം മേഖലയുടെ ലക്ഷ്യങ്ങൾക്ക് അനുസൃതമായി ടൂറിസം അനുഭവം യാഥാർഥ്യമാക്കും. ടൂറിസ്റ്റ് റൂട്ടുകൾ വികസിപ്പിക്കുകയെന്ന ലക്ഷ്യത്തോടെ ബന്ധപ്പെട്ട വകുപ്പുകളുമായി സഹകരിച്ച് വിനോദ സഞ്ചാര കേന്ദ്രങ്ങൾ വികസിപ്പിക്കുന്നതിനായി പ്രവർത്തിക്കും. അസാധാരണ ടൂറിസം അനുഭവമൊരുക്കും. സൗദി പൈതൃകവും സംസ്കാരവും കണ്ടെത്താൻ അവസരമൊരുക്കും. പരിസ്ഥിതി, പ്രകൃതി വിഭവങ്ങളുടെ സംരക്ഷണം ഉറപ്പാക്കും.