രാജ്സമന്ദ്:
രാജസ്ഥാനില്‍ ഭൂമി കയ്യേറ്റവുമായി ബന്ധപ്പെട്ട കേസ് അന്വേഷിക്കാനെത്തിയ പോലീസ് കോണ്‍സ്റ്റബിളിനെ അടിച്ചുകൊന്നു. രാജ്സമന്ദ് ജില്ലയില്‍ ശനിയാഴ്ചയായിരുന്നു സംഭവം.
കുന്‍വാരിയ സ്വദേശിയായ ഹെഡ് കോണ്‍സ്റ്റബിള്‍ അബ്ദുള്‍ ഗനി (48) ആണു കൊല്ലപ്പെട്ടത്. ഭൂമി കൈയേറ്റവുമായി ബന്ധപ്പെട്ട ഒരു തർക്കത്തിൽ ഇടപെടാനാണ് അബ്ദുള്‍ ഗനി സ്ഥലത്തെത്തിയത്. ഇവിടെ സംഘർഷം ഉണ്ടാവുകയും നാട്ടുകാര്‍ പോലീസ് ഉദ്യോഗസ്ഥനെ ആക്രമിക്കുകയുമായിരുന്നു.
ആക്രമണത്തെ തുടര്‍ന്ന് നിലത്തുവീണ ഉദ്യോഗസ്ഥനെ പ്രദേശത്തെ ചികിത്സാ കേന്ദ്രത്തില്‍ എത്തിച്ചെങ്കിലും മരിച്ചിരുന്നു. മുതിര്‍ന്ന പോലീസ് ഉദ്യോഗസ്ഥര്‍ സംഭവസ്ഥലത്തെത്തി സ്ഥിതിഗതികള്‍ വിലയിരുത്തി. അക്രമികളില്‍ ചിലരെ അറസ്റ്റ് ചെയ്തതായാണു സൂചന.