കൊച്ചി:
മേലുദ്യോഗസ്ഥനില്‍ നിന്നുണ്ടായ മോശം പെരുമാറ്റത്തെ തുടര്‍ന്ന് നാടുവിട്ട സെന്‍ട്രല്‍ സി.ഐ നവാസ് ഫേസ്ബുക്കിലൂടെ മാപ്പ് ചോദിച്ചു. ഇന്ന് രാവിലെ കോയമ്പത്തൂരിനടുത്ത് വച്ച് കേരള പൊലീസ് കസ്റ്റഡിയിലെടുത്ത നവാസ് കേരളത്തിലേക്കുള്ള യാത്രക്കിടയിലാണ് ഫേസ്ബുക്കിലൂടെ മാപ്പ് പറഞ്ഞത്.
മാപ്പ്…. വിഷമിപ്പിച്ചതിന്…
മനസ്സ് നഷ്ടപ്പെടുമെന്നായപ്പോള്‍ ശാന്തി തേടി ഒരു യാത്ര പോയതാണ്
ഇപ്പോള്‍ തിരികെ യാത്ര…
ഇങ്ങനെയാണ് നവാസ് ഫേസ്ബുക്കില്‍ കുറിച്ചത്.
കരൂര്‍ റെയില്‍വേ പൊലീസില്‍ നിന്നും ഇന്ന് രാവിലെയോടെ മലമ്പുഴ പൊലീസ് ഏറ്റെടുത്ത നവാസ് ഇപ്പോള്‍ കൊച്ചിയിലേക്കുള്ള യാത്രയിലാണ്. പാലക്കാട് വച്ച് കൊച്ചി പൊലീസ് ഏറ്റെടുത്ത അദ്ദേഹം വൈകിട്ട് നാല് മണിയ്ക്ക് മുന്‍പായി കൊച്ചിയിലെത്തും എന്നാണ് കരുതുന്നത്.
മൂന്നുദിവസം മുന്പാണു നവാസിനെ കാണാതായത്. നവാസിനെ കാണാനില്ലെന്നു കാണിച്ച് കേരള പോലീസിന്റെ ഒദ്യോഗിക ഫേസ്ബുക്ക് പേജിൽ ഉൾപ്പടെ അറിയിപ്പ് നൽകിയിരുന്നു. മേലുദ്യോഗസ്ഥരുടെ പീഡനത്തെത്തുടർന്നാണു സിഐ നവാസ് നാടുവിട്ടതെന്നാണ് അദ്ദേഹത്തിന്‍റെ ഭാര്യ മുഖ്യമന്ത്രിക്കു നൽകിയ പരാതിയിൽ പറയുന്നത്.
നവാസും എസിപി സുരേഷ് കുമാറും തമ്മിൽ അഭിപ്രായഭിന്നത ഉണ്ടായിരുന്നെന്ന് സിറ്റി പോലീസ് കമ്മീഷണർ വിജയ് സാഖറെ സ്ഥിരീകരിച്ചു. ഇക്കാര്യം തൻറെ ശ്രദ്ധയിൽപ്പെട്ടിട്ടുണ്ടെന്നും അന്വേഷണം നടത്തുമെന്നും അദ്ദേഹം പറഞ്ഞു.