മുംബൈ:
ഓഹരിവിപണിയിൽ വൻ മുന്നേറ്റം. തുടർച്ചയായി രണ്ടാമത്തെ ദിവസവും ഓഹരി വിപണിയിൽ മികച്ച നേട്ടം. ആറു മാസത്തിനുള്ളിലെ ഏറ്റവും മികച്ച ഏകദിന കുതിപ്പായിരുന്നു ഇന്നലത്തേത്. സെൻസെക്സ് 382.67 പോയിന്‍റ് (1.04 ശതമാനം) കയറി 37,054.1 ൽ ക്ലോസ് ചെയ്തു. കഴിഞ്ഞ സെപ്റ്റംബർ 19ന് 37,121.22ൽ ക്ലോസ് ചെയ്തശേഷമുള്ള ഏറ്റവും ഉയർന്ന ക്ലോസിംഗാണിത്. നിഫ്റ്റി 132.65 പോയിന്‍റ് (1.2 ശതമാനം) കയറി 11,168.05 ൽ ക്ലോസ് ചെയ്തു. സെപ്റ്റംബർ 26 നുശേഷമുള്ള ഏറ്റവും ഉയർന്ന ക്ലോസിംഗാണിത്. മാർച്ചിൽ മാത്രം സെൻസെക്സ് 1253.78 പോയിന്‍റും നിഫ്റ്റി 375.55 പോയിന്‍റും കയറി.
സെൻസെക്സ് 339 പോയന്റ് ഉയർന്ന് 37393 ലും നിഫ്റ്റി 98 പോയന്റ് 11266 ലുമാണ് ഇന്ന് വ്യാപാരം നടക്കുന്നത്. ബിഎസ്ഇയിലെ 1323 കമ്പനികളുടെ ഓഹരികൾ നേട്ടത്തിലും 322 കമ്പനികളുടെ ഓഹരികൾ നഷ്ടത്തിലുമാണ്. പവർ ഗ്രിഡ് കോർപ്പറേഷൻ, ഐ.സി.ഐ.സി.ഐ. ബാങ്ക്, ഹിന്റാൽകോ, ടാറ്റ മോട്ടോഴ്സ്, മാരുതി സുസുകി, വേദാന്ത, റിലയൻസ്, ഏഷ്യൻ പെയിന്റ് തുടങ്ങിയ ഓഹരികൾ നേട്ടത്തിലാണ്. ഭാരതി ഇൻഫ്രടെൽ, ഐഷർ മോട്ടോഴ്സ്, ഒ.എൻ.ജി.സി, ഹീറോ മോട്ടോർകോർപ്, കോൾ ഇന്ത്യ, ബജാജ് ഓട്ടോ, ഭാരതി എയർടെൽ, സിപ്ല തുടങ്ങിയ ഓഹരികൾ നഷ്ടത്തിലുമാണ്.
ബാലാക്കോട്ട് ആക്രമണത്തിനു ശേഷം ഓഹരി കമ്പോളങ്ങൾ മെല്ലെ തിരിച്ചു കയറുകയായിരുന്നു. സിംഗപ്പൂർ ഗവൺമെന്‍റിന്‍റെ നിക്ഷേപ കമ്പനി ഭാരതി എയർടെലിൽ 5000 കോടി രൂപ നിക്ഷേപിക്കുമെന്ന റിപ്പോർട്ടുകളെ തുടർന്ന് എയർടെൽ ഓഹരിവില എട്ടു ശതമാനം കയറി. റിലയൻസ് ഇൻഡസ്ട്രീസ് ജിയോയുടെ ഒപ്റ്റിക്കൽ ഫൈബർ കേബിളുകൾ പ്രത്യേക കമ്പനിയുടേതാക്കിയിട്ട് ഓഹരി വില്ക്കുമെന്ന റിപ്പോർട്ട് റിലയൻസിന്‍റെയും വില ഉയർത്തി.
ഇന്ത്യൻ ഓഹരികളെപ്പറ്റി വിദേശ ബ്രോക്കറേജുകൾ നല്ല പ്രതീക്ഷയാണു പുലർത്തുന്നത്. സെൻസെക്സ് ഇക്കൊല്ലം 40,000 കടക്കുമെന്നു ബിഎൻപി പാരിബ കരുതുന്നു. മോർഗൻ സ്റ്റാൻലി സെൻസെക്സ് 42,000 കടക്കുമെന്നു വിലയിരുത്തുന്നു. ബുൾ തരംഗമുണ്ടായാൽ 47,000 വരെ എത്താം, അഥവാ താഴോട്ടായാൽ 33,000 വരെയാകും സെൻസെക്സ് എന്ന് അവർ കണക്കാക്കുന്നു. വിദേശനിക്ഷേപകർ ഇന്ത്യൻ ഓഹരി വിപണിയിലേക്കു വൻതോതിലുള്ള നിക്ഷേപവുമായി വരുമെന്ന റിപ്പോർട്ടുകൾ രൂപയ്ക്കു കരുത്തായി. ഡോളർവില വീണ്ടും 70 രൂപയ്ക്കു താഴെയായി. ഇന്നലെ മാത്രം 27 പൈസയാണു ഡോളറിനു കുറഞ്ഞത്. ഡോളർ 69.88 രൂപയിൽ ക്ലോസ് ചെയ്തു. വിദേശത്തു ക്രൂഡ് ഓയിൽ വില താണു നില്ക്കുന്നതും ഡോളറിനു ചില്ലറ ദൗർബല്യം ഉണ്ടായതും രൂപയ്ക്കു സഹായമായി.